အယ်ဒီတာ့ရွာ (၁၃)
“လက်”ဆိုတာနဲ့ ပတ်သက်ပြီး တောင်တွေ၊ မြောက်တွေ၊ တွေးကြည့်ခဲ့ဖူးပါတယ်။ ဒါပေမယ့် စာတစ်တန်, ပေတစ်ဖွဲ့တော့ မရေးဖြစ်ခဲ့ပါဘူး။ အမျိုးသားရေးလှုပ်ရှားမှုကြီးတွေ နှစ်ကြိမ်တိုင်တိုင် အရှင်လတ်လတ် တွေ့ကြုံခဲ့ရတော့ ဒီလက်အကြောင်းဟာလည်း “Replay” ဆန်ဆန် ကျမခေါင်းထဲကို ပြန်ပြန်ဝင်နေပါတယ်။ ဒီနေ့တော့ “လက်” အကြောင်း စာတိုလေး တစ်စောင်ရေးချင်နေမိတယ်။
“လက်”အကြောင်း မပြောခင် နည်းနည်းပါးပါး ၀န်ခံချင်ပါသေးတယ်။ ဒီအတွေးဟာ ကျမနဲ့ ကိုယ်ပိုင်အတွေးလို့ ပြောလို့မရပါဘူး။ ဘာလို့လဲ ဆိုရင် မြတ်စွာဘုရားရဲ့ အင်္ဂုတ္ထိုရ် မြန်မာပြန်ကို ဖတ်မိပြီးတဲ့နောက်မှ ဆင့်ပွားတွေး ခဲ့မိလို့ပါ။ လေရှည်တယ် မထင်ဘူးဆိုရင် နည်းနည်း ထပ်ပြောပါရစေ။ မြတ်စွာဘုရားက “မျက်စိ”နဲ့ ပတ်သက်လို့ အနုပညာ ဆန်ဆန် ဟောကြားခဲ့ဖူးပါတယ်။
၁။ မျက်စိနှစ်လုံးမြင် ပုဂ္ဂိုလ် = ပစ္စုပ္ပန် သံသရာအကျိုး နှစ်မျိုးကို သိသူ။ မိမိအကျိုး, သူတစ်ပါး အကျိုးကို သိသူ။
၂။ မျက်စိတစ်ဖက်မြင် ပုဂ္ဂိုလ် = ပစ္စုပ္ပန် အကျိုးကိုသာသိပြီး သံသရာအကျိုးကို မသိသူ။ ကိုယ်ကျိုးသာသိပြီး သူတစ်ပါးကျိုး မသိသူ။
၃။ မျက်စိစုံလုံးကန်း ပုဂ္ဂိုလ် = ဘာကိုမှ မမြင်ရသူ, တဲ့။
မြတ်စွာဘုရားရှင်ရဲ့ မျက်စိနဲ့ ပတ်သက်တဲ့ အဆုံးအမကို ဖတ်ပြီး “လက်”နဲ့ ပတ်သက်လို့ ဒီလို အတွေး နယ်ချဲ့မိပါတယ်။
ကံကြမ္မာရဲ့ တစ်စုံတစ်ရာ အမှားအယွင်း မရှိဘူးဆိုရင် ကျမတို့ လူသားအားလုံးမှာ လက်နှစ်ဖက်စီ ရှိကြပါတယ်။ ဒါဖြင့် ဒီလက်တွေက ဘာလဲ။ လက်နှစ်ဖက်ရဲ့ အဓိပ္ပါယ်က ဘာလဲ။ သူများတွေရဲ့ အောင်မြင်မှုကို လက်ခုတ်တီး ပေးရုံ သက်သက်ပဲလား။
လယ်သမား မိသားစုက ပေါက်ဖွားခဲ့ရတဲ့ ကျမအတွက် လက်နှစ်ဖက်ရဲ့ ဟန်ချက်ကို ဒီထက်ပိုပြီး တန်ဖိုးထားမိပါတယ်။
မှည့်ဝင်းနေတဲ့ စပါးခင်းကို ရိတ်သိမ်းဖို့ ဆိုရင်တောင် ဘယ်လက်နဲ့ စပါးပင်တွေကို စုကိုင်ပြီး ညာလက်နဲ့ တံစဉ်ကိုင်ပြီး ရိတ်ဖြတ်လိုက်ပါမှ အဲဒီစပါးတွေဟာ ကျမတို့ ထမင်းအိုးထဲကို ရောက်လာနိုင်မှာ မဟုတ်လား။
ကျမတို့မှာ လက်နှစ်ဖက်စီ ရှိကြတယ်။ အဲဒီလက်နှစ်ဖက်ဟာ လေးနက်တဲ့ အဓိပ္ပါယ်တွေ ကိုယ်စီ ဆောင်နေရပါမယ်။ ဒါမှ လက်နှစ်ဖက်ရဲ့ တန်ဖိုး အစစ်ပါ။
ကျမယုံကြည်ပါတယ်။ “ညာ”လက်ဟာ မရသေးတဲ့ အခွင့်အရေးအသစ်တွေကို ရယူဖို့ဖြစ်ပြီး “ဘယ်”လက်ဟာ ကိုယ်ရခဲ့ပြီးသား အခွင့်အရေး ပိုင်ဆိုင်မှုတွေကို ကိုယ့်လောက် ပိုင်ဆိုင်ခွင့် မရှိသေးသူတွေကို ဖြန့်ဝေပေးဖို့ပါ။
မိမိထက် ကြီးကျယ် မြင့်မြတ်သူတွေရဲ့ လုပ်ဆောင်မှု၊ အောင်မြင်မှုတွေကို ကြိုးစားဖမ်းဆုပ်ဖို့ “ညာ”လက်ကို အသုံးပြုရသလို မိမိအောက်နိမ့်ပါးသူ၊ အတွေ့အကြုံ မရှိသေးသူတွေကို လက်တွဲ ခေါ်ယူဖို့ “ဘယ်”လက်ကိုလည်း အမြဲတမ်း အသုံးပြုနေကြမှာ ဖြစ်ပါတယ်။
“ညာ”လက်ကိုသာ ဖြန့်ကားပြီး “ဘယ်”လက်နဲ့ မဖြန့်ဝေဘူး ဆိုရင် ဒီလူဟာ “မသန်မစွမ်းသူ” စာရင်းထဲမှာ ထည့်ထားရမှာ ဖြစ်ပါတယ်။ သူဟာ အဘိုးအဘွား ဂျင်နရေးရှင်းကို ကျေးဇူးကန်းပြီး နယူးဂျင်နရေးရှင်းကို သစ္စာဖောက်သူပါ။ ဘိုးဘွားတွေရဲ့ အမွေအနှစ်တွေကိုသာ စားသုံးပြီး သားမြေးတွေကို လက်ဆင့် မကမ်းနိုင်၊ တွဲမခေါ်နိုင်ဘူး ဆိုရင် ဒီလူဟာ ကမ္ဘာ့ လူ့ယဉ်ကျေးမှုကို တာဝန်မကျေနိုင်သူ လူညံ့ တစ်ယောက်ပါပဲ။
ကျမတို့ အရှင်လတ်လတ် ကြုံတွေ့ခဲ့ရတဲ့ အမျိုးသားလှုပ်ရှားမှုကြီးတွေမှာ လက်တစ်ဖက်သာပါတဲ့ ဟင်ဒီကပ်တွေ တွေ့တွေ့နေရလို့ တော်တော်လေး စိတ်ပျက်မိပါတယ်။ ကျမတို့ နိုင်ငံရဲ့ မည်းမှောင်ကျတဲ့ သမိုင်းတိုတိုလေး ထဲမှာကိုပဲ မျိုးဆက်သုံးဆက်တွေ့ရပါတယ်။
၁။ နေ၀င်း ရောင်နီပျိုးချိန် ကျောင်းသား သမဂ္ဂမျိုးဆက်
၂။ နေ၀င်း နေ၀င်ချိန် (၈၈)မျိုးဆက်
၃။ သန်းရွှေ နေ၀င်ရီတရော ၂၀၀၇ ရွှေခြည်လင်းလက်မျိုးဆက်။
ကျမယုံကြည်ပါတယ်။ ကျောင်းသား သမဂ္ဂဘယ်လက်နဲ့ (၈၈)မျိုးဆက် ညာလက်ဟာ မြဲမြံနေရပါမယ်။ (၈၈)မျိုးဆက်ရဲ့ “ဘယ်”လက်ဟာလည်း (၂၀၀၇)မျိုးဆက်ရဲ့ “ညာ”လက်ကို လှမ်းတွဲထားရပါမယ်။ ဒါဆိုရင် ကျမတို့ လက်တွေဆီက အောင်မြင်မှုတွေ ရရှိလာမှာပါ။
ဘာမှမရဘူးဆိုရင်တောင် ကျမတို့ လက်တွေဟာ သမိုင်းကို တန်ဖိုးထားတဲ့, သိက္ခာရှိတဲ့ လက်တွေအနေနဲ့ ရင်ကော့ ခေါင်းမော့နိုင်မှာပါ။
ညီညွတ်တဲ့ လက်တွေရဲ့ ကျရှုံးခန်းဆိုတာ သမိုင်းမှာ ရှိဖူးလို့လား။ ဒီလက်တွေ မြဲမြံပါစေ။ သိက္ခာရှိကြပါစေ။ အတ္တမာနတွေ, ပုဂ္ဂလိက အယူအဆတွေကြောင့် ဒီလက်တွေ လျော့လျဲ မသွားပါစေနဲ့ လို့သာ။
ဆုထားမြတ်ခြယ် + ဇင်ဝေသော်
(အေ၊ အို၊ အေ၊ ဘီ)
လက်
Subscribe to:
Post Comments (Atom)
သံဃာတော်များ၏ အင်အား
ငွေကြာရံ ဘုန်းကြီးကျောင်းအား မတရား ၀င်ရောက် ဖျက်ဆီးသော ရုပ်သံကြည့်ရန်
0 comments:
Post a Comment